Петĕр Хусанкай. «Таня» поэма сыпăкĕ

Петĕр Хусанкай. «Таня» поэма сыпăкĕ

Амăшне каларĕ хĕрĕ

Вăрттăн, ерипен:

- Эп вăрçа каятăп, -терĕ, -

Маншăн ан шиклен.

Амăшĕ чăр пăхрĕ: «Эсĕ!»

Чакрĕ, чакрĕ вăй…

Хĕрхенсе куççуленмесĕр

Тӳсеймерĕ хăй.

Куç тулли тăрать чипер хĕр

Унăн умĕнче.

Таврара кĕрлет хисепсĕр

Юн тăкан тĕнче.

Эх, анне чĕри! Çунать-çке

Вăл çапла ялан

Çумĕнчи ăшă çуначĕ

Пушшине туйсан.