Кĕçтук Кольцов «Йытта – йытă вилĕмĕ»

Кĕçтук Кольцов

Йытта – йытă вилĕмĕ

Тăвăл пек тапранчĕ аслă халăх,

Вăл хаяррăн, çиллĕн çĕкленет.

Ваклама тухатпăр татăк-татăк

Çĕр çинчи чи ирсĕр çĕлене.

Авалтан пырать йăламăр çакă:

«Йытта йытă вилĕмĕ кĕтет».

Фашистсен ылханлă йăхĕ акă

Ӳпресен ĕмрийĕ пек пĕтет.

Вăл ăнлантăр, Советсен çĕршывĕ

Униче хапхийĕ мар иккен.

Эп вилсессĕн тухĕ манăн ывăл,

Хăй каччи ӳксессĕн – сар пике.

Кĕрт йытти хуртланнă, çĕрнĕ çарĕ

Сĕтĕрсе тухаймĕ ӳт-тирне.

Тантăшсем, хăюллăн та пĕр харăс

Халь утар-ха çапăçу хирне!