Александр Артемьев "Мир салтакӗ"

Мир салтакĕ

Шуралман-ха шурăмпуçĕ,
Ялăм-йышăм вăранман,
Мир салтакĕ, çĕнтерÿçĕ,
Таврăнатăп эп çартан.

Таврăнатăп эп маттуррăн
Инçетри ют çĕрсенчен, –
Ачаран палланă хурăн
Пуç таять çул хĕрринчен.

Саламларĕ юратуллă
Аслă хирĕм те мана,
Тулăх ÿснĕ сарă тулă
Савăнтарчĕ чунăма.

Тунсăхланă яш чĕремшĕн
Хаклă эсĕ, тăван хир!
Амăртса пĕр ĕçлемешкĕн
Тухăп хам та ыран ир.

Кăвак шуçăм кăвакарчĕ,
Кил умне пырса çитсен,
Кăвак çÿçлĕ ватă карчăк
Алăкра тăрать кĕтсе..................