стихотворение Максима Ястрана "Ирхине, шурăмпуç çĕкленсессĕн"

Ирхине, шурăмпуç çĕкленсессĕн,

Хĕрлĕ хĕм хĕретсен тухăçа,

Тăшмана аркатса çĕмĕрмешкĕн

Эшелон тухса кайрĕ вăрçа.

Эшелон тухса кайрĕ... А эсĕ

Тутăрна сĕлтсе юлтăн пĕччен.

Сан шур тутăр питех çӳçентерчĕ

Ман чуна çеçен хир тӳпинче.

Курăнми пултăн эс. Эпĕ кайрăм,

Сан сăнна асăмра упраса.

Сан çинчен çыртăм эп сăвă-юрă,

Сăмаха ахах пек суйласа.