Салтак

Мир салтакĕ

Шуралман-ха шурăмпуçĕ,
Ялăм-йышăм вăранман,
Мир салтакĕ, çĕнтерÿçĕ,
Таврăнатăп эп çартан.

Таврăнатăп эп маттуррăн
Инçетри ют çĕрсенчен, –
Ачаран палланă хурăн
Пуç таять çул хĕрринчен.

Кăвак шуçăм кăвакарчĕ,
Кил умне пырса çитсен,
Кăвак çÿçлĕ ватă карчăк
Алăкра тăрать кĕтсе.

Ват аннеçĕм йĕрсе ячĕ,
Иĕрсе ячĕ чуптуса:
"Темиçе çул макăрманччĕ –
Халь йĕретĕп савăнса...

Тавтапуç, мухтавлă ывлăм:
Эс çĕнтертĕн тăшмана!"
Анне мар, Тăван çĕршывăм
Тав тăвать иккен мана.