Василий Алендей "Амансан"

Василий Алендей
Амансан

Фронтран, йывăр аманнипе,
Илсе кайма тухсан мана,
Эп чун-чĕре ыратнипе
Пăхайса илтĕм таврана.

Юлаççĕ савнă юлташсем,
Вĕсем чупаççĕ мал енне.
Шăпăртатса куççулĕсем
Юхайса анчĕç пит çине.

Эх, хытă-çке салтак чĕри,
Халь ма çемçелчĕ-ши çапла?
Çапăçуран ман çав тери
Тухас килмест аяккалла.

Каяс килмест юлташсенчен
Инçе, инçе уйăрăлса.
Ман таврăнас килет çĕлен
Пуçне йăлтах çапса ватса.