Вăрçăри уçланкăра

Александр Артемьев

Вăрçăри уçланкăра

Çемçелет ман хытнă чунăм

Çакă юнлă вăрçăра

Асилсен сана, яш кунăм,

Ют çĕрти уçланкăра.

Траншейсем вĕçĕ-хĕррисĕр,

Окопсем йĕри-тавра.

Тар шăршиллĕ, илĕртÿсĕр

Вăрçăри уçланкăра.

Шăхăрать снаряд та пуля –

Çичĕ ют çилли кăра...

Кам чĕри хаваслă пулĕ

Çак кичем уçланкăра!

Эпĕр те кунта юрлатпăр,

Савнисем, çĕршыв çинчен,

Çапăçма тупа тăватпăр

Тăшмана çĕнтериччен.