Айташ Ю.Эвакуаци

Стихотворение о трагической судьбе  детей периода Великой Отечественной войны

– Тревога! – шартах вӑранать хӗр ача.

Вут пек пӗҫерет кӗлетки.

– Лӑплан-ха, – тет амӑш, – ку тӗлӗк анчах,

Юмах аташтарнӑ пекки.

– Анне, хӑвӑртрах аяла, путвала!

Илтместӗн-им, бомба ӳкет!

– Ачам, пӗчӗкскерӗм, ан ҫуйӑх ытла,

Ҫук бомба кунта, шеремет.

– Ӑҫта пирӗн Вовка? Нинук ма тӑман?

– Эй-яй, пӗчӗкҫеҫ айванкка,

Халь тек кирлӗ мар вӗсене вӑратма,

Вӗсем кайрӗҫ пит аякка.